Tuesday, June 15, 2010

ಉತ್ತರಗಳನ್ನು ಹುಡುಕುತ್ತಾ ?


ಕನಸು ಕಾಣುವ ಹೊತ್ತಿನಲಿ
ಬಂದು ಸಾಗುವ ವರ್ಣಗಳು
ಕಪ್ಪು ಬಿಳಿಯ ಪರದೆಯಲಿ
ವರ್ಣ ರಂಜಿತ ಚಿತ್ರಗಳು
 ಅರ್ಥವಾಗುವಂತೆ ?
ಅರ್ಥವಾಗದಂತೆ ?
ಬಂದು ಸಾಗುವ ದೃಷ್ಯಗಳು

ಬದುಕಿನ ಬವಣೆಗಳು
ಕಾಣದ ವೇದನೆಗಳು
ವಿಷಾದದ ಅಲೆಗಳು
ಹಳಿದುಹೋದ ಆಸೆಗಳು
ಮುಗಿದುಹೋದ ಪಯಣಗಳು

ಕಳೆದುಹೋಗದ ಬದುಕುಗಳು
ಸಾಲು ಸಾಲು ಸಾವುಗಳು
ಕೊಳೆತು ನಾರುವ ಶವಗಳು
ತುತ್ತು ಕಾಣದ ದೇಹಗಳು
ಇಂಗಿಹೋದ ಕಣ್ಣುಗಳು
ಹೆಕ್ಕಿ ಸಾಗುವ ರಣಹದ್ದುಗಳು

ತುಂಬಿ ತುಳುಕುವ ಪಾಪದ ಕೊಡಗಳು
ಸತ್ತರು ಸಾಯಲಾಗದ ಭಗ್ನ ಹೃದಯಗಳು
ಹಳಿದುಳಿದ ಆಸೆಗಳಿಗಾಗಿ
ಕಾದು ಕುಳಿತ ಪ್ರೇತಗಳು
ಅರ್ಧಂಬರ್ದ ಸುಟ್ಟ ಪ್ರೇಮ ಪತ್ರಗಳು
ಮುಕ್ತಿ ಸಿಗದ ಮೂಡ ನಂಬಿಕೆಗಳು
ಮುಸಿ ಮುಸಿ ನಕ್ಕು ಸಾಗುವ
ಮಲೆಯ ಮಾರುತಗಳು

ಅರ್ಥವಾಗದ ಹೊತ್ತಿನಲಿ
ವ್ಯರ್ಥ ವ್ಯರ್ಥವಾಗಿ
ಬಂದು ಸಾಗುವ ಕನಸುಗಳಿಗೆ
ಉತ್ತರಗಳನ್ನು ಹುಡುಕುತ್ತಾ ಸಾಗುತ್ತೇನೆ
ಸಾವಿರಾರು ಪ್ರಶ್ನೆಗಳು
ನನ್ನ ಕನಸುಗಳನ್ನು ಕದಡಿ
ಪ್ರಶ್ನೆಗಳನ್ನಾಗಿಸಿ
ಮುಸಿ ಮುಸಿ ನಕ್ಕು ಸಾಗುತ್ತವೆ
ಉತ್ತರಗಳನ್ನು ಹುಡುಕುತ್ತಾ ?

No comments: