Tuesday, August 9, 2011

ಹೊಸ ಉದಯ

ಬಿರಿದ ಸೂರ್ಯನ ಬಣ್ಣ
ಉರಿವ ಹೊಂಬೆಳಕು
ಸದ್ದುಗದ್ದಲದ ಸಂಭ್ರಮ
ಊರುಳಾಡುವಾ ಕಾಲ

ಗುಬ್ಬಿಗಳ ಚಲ್ಲಾಟ
ಕೂಗೊ ಕೋಳಿಯ ಜಂಭ
ಗುಟುರಾಡುವ ಕರಿಬಸವ
ಜೋಗಿಯ ಗೀ,ಗೀ ಪದವು

ಚೌಕ ಬಾರದ ಆಟ
ಕುಂಟು ಬಿಲ್ಲೆಯ ನೋಟ
ಮರಕೋತಿ ಚಿನ್ನಿದಾಂಡು
ಕಣ್ಣಮುಚ್ಚಾಲೆಯು

ಬೀಸು ಕಲ್ಲಿನ ಚಬುದ
ಜೋಳ ಕುಟ್ಟುವ ಒನಕೆ
ಹಾಲು ಕಡೆಯುವ ಕೋಲು
ಕಳ್ಳ ಬೆಕ್ಕಿನ ಕಾಟ

ಜಾನ ಪದ ಜಗುಲಿಗಳು
ಪಂಚಾಯ್ತಿ ಕಚೇರಿಗಳು
ಬಾವಿಯಲಿ ಕಿರುಚುವ
ಕಬ್ಬಿಣದ ಗಿರಣಿಗಳು

ಕೆಳಗೇರಿ ಹೊಲಗೇರಿ
ಗೌಡನ ನಡುಗೇರಿ
ಬ್ರಾಹ್ಮಣರ ಸುಳಿಗೇರಿ
ಮತ್ತಲವು ಬೀದಿಗಳು

ಆ ಕಪ್ಪುಡುಗಿಯ ಮೊಗದಲ್ಲಿ
ಚಂದ್ರನಂತಹ ಕಳೆಯು
ಮುಡಿಗೆ ಮಲ್ಲಿಗೆ ಹೂವು
ಮನಸ್ಸು ಕಾಮನಬಿಲ್ಲು

ಕಾಳಜ್ಜನ ಗೂಡಂಗಡಿ
ಪಕೀರಪ್ಪನ ಕಸಾಯಿಖಾನೆ
ಶಂಕರನ ಶೇಂಧಿ ನಶೆ
ಕೆಂಚವ್ವನ ಹೋಟಲ್ಲು

ಕರೆಯ ತುಂಬಿಲ್ಲ ನೀರು
ಕೋಡಿ ಹರಿಯುವ ಝರಿಯು
ಜಿಗಿದು ಎಗರುವ ಮೀನು
ಸೀಗಡಿ ಪಕ್ಕೆಗಳು

ರಾಗಿ ಭತ್ತದ ತೆನೆಗಳು
ತೂಗುವ ಹೊಂಬಾಳೆ
ಅಡಿಕೆ ಮಾವಿನ ತೋಟ
ಬೈಗು ಹುಲ್ಲಿನ ನಗೆಯು

ಸೂರ್ಯ ಜಾರುವ ಸಮಯ
ಮತ್ತೊಂದು ಹೊಸ ಸಂಜೆ
ಉರುಳುತಿದೆ ಕಾಲವು
ಕೆಂಬಣ್ಣದ ಮುಗಿಲನು ದಾಟಿ.

3 comments:

ವಿಚಲಿತ... said...

ಕಾಮನಬಿಲ್ಲಿನಂತೆಯೇ ಹಲವು ಬಣ್ಣಗಳಿಂದ ಕೂಡಿದೆ.

_ನನ್ನ ಬ್ಲಾಗಿಗೂ ಬನ್ನಿ.

sunaath said...

ಚಿತ್ರ ಹಾಗು ಚಿತ್ರಣ ಎರಡೂ ಸೊಗಸಾಗಿವೆ. ಅಭಿನಂದನೆಗಳು.

RAGHU said...

nice..

visit my blog @ http://ragat-paradise.blogspot.com

RAGHU