Friday, May 11, 2012

ಬನ್ನಿ ಬನ್ನಿ ಸ್ನೇಹಿತರೆ


ಬನ್ನಿ ಬನ್ನಿ ಸ್ನೇಹಿತರೇ
ಮನೆಯ ಕದವು ತೆರೆದಿದೆ
ಗೋಡೆ ಮೇಲೆ ದೀಪ ಉರಿದು
ಮೈಮರೆತು ಕಳೆದಿದೆ
ಸ್ವಾಗತವನು ಕೋರಿದೆ

ಕರಿ ಗುಡ್ಡ ತಡಿಯ ಮನೆ
ಜಿನು ಜಿನುಗುವ ನೀರ ಝರಿಯು
ಹಸಿರ ಸಿರಿಯ ಹೊದಿಕೆ ಹೊದ್ದ
ತಂಪು ಇಂಪಿನ ನೆಲೆಯು
ಬನ್ನಿ ಬನ್ನಿ ಸ್ನೇಹಿತರೇ

ಒಲೆಯ ಮೇಲೆ ರಾಗಿ ರೊಟ್ಟಿ
ಬಿಸಿ ಹಾರದ ಭೋಜನವು
ಹಾಲು ತುಪ್ಪ ಸಂಡಿಗೆ
ರುಚಿ ಸವಿಯುವ ಜಾಗವು
ಬನ್ನಿ ಬನ್ನಿ ಸ್ನೇಹಿತರೇ

ನಡು ಗುಡ್ಡವ ಹತ್ತಿ ಬನ್ನಿ
ನೀರ ಝರಿಯ ಜಿಗಿದು ಬನ್ನಿ
ಕಾಲು ಹಾದಿ ತುಳಿದು ಬನ್ನಿ
ಬಂಡೆ ಹತ್ತಿ ಮುಂದೆ ಬನ್ನಿ
ಬನ್ನಿ ಬನ್ನಿ ಸ್ನೇಹಿತರೇ

ಇದೋ ತಂದೆ ಚಾಪೆಯನು
ಚಾಮರವ ವೀಯಲಾರೆ
ಮರೆಯದಿರಿ ಕಾಯುವೆನು
ಇತ್ತ ಒಮ್ಮೆ ಹೆಜ್ಜೆಯೂರಿ
ಬನ್ನಿ ಬನ್ನಿ ಸ್ನೇಹಿತರೇ

ಬದುಕುಘೋರ ಮನಸ್ಸುಭಾರ
ಎಲ್ಲ ಚಿಂತೆ ದೂರ ಮಾಡಿ
ಹಸಿರಮ್ಮನ ಮಡಿಲ ಸೇರಿ
ವಾತ್ಸಲ್ಯದಿ ಮುಳುಗುವ
ನಿಮಗಾಗಿ ಕಾಯುತಿಹೆ 
ಬನ್ನಿ ಬನ್ನಿ ಸ್ನೇಹಿತರೆ ಬನ್ನಿ ಬನ್ನಿ.

2 comments:

satya mitra said...

ಹಸಿರುಟ್ಟ ಪ್ರಕೃತಿಯ ಮಡಿಲ ಮಧ್ಯದಲ್ಲೊಂದು ಮನೆಯ ಮಾಡಿ ಝರಿ ತೊರೆಗಳಿರಲಿ ಸುತ್ತಮುತ್ತಾ. ಗಿರಿ ಕಂದರಗಳು ಅನಾತಿ ದೂರ. ನಾವೆಲ್ಲಾ ಬರುವೆವು ಪ್ರವಾಸದೆಸರಲ್ಲಿ ಪ್ರವಾಹದಂತೆ. ಚಾಮರವ ಬೀಸಬೇಡಿ ಚಾಪೆಯನು ಹಾಸಬೇಡಿ. ಭೂರಮೆಯ ಹಾಸೆ ಸಾಕು. ತಂಗಾಳಿಯ ಪಿಸುಮಾತೆ ಪರಾಕು ನಮಗೆ. ರಾಗಿ ರೊಟ್ಟಿ ಯೊಂದಿಗಿಷ್ಟು ಉಚ್ಚೆಳ್ ಚಟ್ನಿ ಸಾಕಷ್ಟಾಗುವುದು ನಮ್ಮ ಉದರಕೆ. ವಾತ್ಸಲ್ಯದಿಂದ ಕರೆದಿರಲ್ಲ ಅಷ್ಟೇ ಸಾಕು. ದಿನಾಂಕವೊಂದನ್ನು ನಿಗದಿ ಮಾಡಿ ಅಂದೇ ನಾವೆಲ್ಲಾ ನಿಮ್ಮ ಮುಂದೆ.

ವಸಂತ್ ಕೋಡಿಹಳ್ಳಿ said...

ನಿಮ್ಮ ಅನಿಸಿಕೆ ತುಂಬಾ ಖುಷಿಕೊಟ್ಟಿತು ಸರ್ ಇದಕ್ಕೆ ಯಾವರೀತಿ ಪ್ರತಿಕ್ರಿಯಿಸಿಸಬೇಕು ತಿಳಿಯುತ್ತಿಲ್ಲ ತುಂಬಾ ಧನ್ಯವಾದಗಳು..