Friday, September 14, 2012

ನೆಲದ ಸತ್ವ



ನೆಲದ ಸತ್ವ ಸಡಿಲಗೊಂಡು
ಪರಿಹಾಸದಿ ತೊಡಗಿದೆ
ಕುಟಿಲ ಬೀಜ ಮೊಳಕೆ ಬಿರಿದು
ಜಗವೆಲ್ಲ ಹರಡಿದೆ

ಕಾಂತಿ ಹೀನ ಕಣ್ಣುಗಳು
ಜನರ ಕಂಡು ಸೊರಗಿವೆ
ಹಿಂಬಾಗಿಲ ನಾಗರಗಳು
ಹೆಡೆಯತ್ತಿ ಕುಣಿದಿವೆ

ಏನಿದೀ! ಪರಿಹಾಸವು
ಉತ್ತರಗಳ ಹುಡುಕಿದೆ
ಮಣಭಾರದ ಪ್ರಶ್ನೆಗಳೇ
ಶಿರವಬಾಗಿ ನಮಿಸಿವೆ

ಇಳೆಯ ತಂಪು ಎಂದೋ ಸೊರಗಿ
ಜ್ವಾಲೆಯಾಗಿ ಹಬ್ಬುತಿದೆ
ಕಲ್ಮಶಗಳ ಘಾಟು ಹೊಗೆ
ಪ್ರತಿ ಎಲ್ಲೆಯೂ ತಬ್ಬುತಿದೆ

ಸತ್ವಹೀನ ಟೊಳ್ಳು ಮಾತು
ಕನಸನೆಂದು ಕಟ್ಟದು
ಸತ್ಯ ಮರೆತ ಸುಳ್ಳಾಟಕೆ
ಜಯವೆಂಬುದು ದಕ್ಕದು

ಜಗವೆಂಬುದು ಬರಿ ಭ್ರಮೆಯು
ಗೊಂದಲಗಳ ಚಿತ್ರಣ  
ಜಗ್ಗದಿರು ಕಟು ವಾಸ್ತವವೇ ನೀ
ಸೋತರೆ ಅದುವೆ ಮರಣ

No comments: