Wednesday, January 29, 2014

ಕಟ್ಟಾಜ್ಞೆ


ಕೆಲವೊಮ್ಮೆ
ರಸ್ತೆಯಲ್ಲಿ ನನ್ನ ಕಂಡಾಗ...
ಗೋಡೆಗಳು ಮಾತಿಗಿಳಿಸುತ್ತವೆ
ಜಗುಲಿಗಳು ಜಾಗ ಕೊಡುತ್ತವೆ
ನಯವಾದ ಗಾಳಿ
ಹಿತವಾದ ಬೆಳಕು
ಯಾವೂದೊಂದೂ
ಬೇಧ ತೋರುವುದಿಲ್ಲ

ಅವುಗಳಿಗೆ
ವಾಸ್ತವದ ಒಳ ಮರ್ಮಗಳು
ಗೊತ್ತಿಲ್ಲವಿರಬಹುದು
ಮರ್ಕಟ ಮನಸ್ಸುಗಳ ಕಿತ್ತಾಟ
ಕುಲ ಧರ್ಮಗಳ ತಿಕ್ಕಾಟ
ಮೇಲು ಕೀಳುಗಳೊಳಗಿನ
ನರಲಾಟ ಗೋಳಾಟಗಳು
ಅರ್ಥವಾಗದೆಯೇ
ಇರಬಹುದು

ಮಾತಿಗಿಳಿದ ಮಾತ್ರಕ್ಕೆ
ಪ್ರತಿಕ್ರಿಯಿಸುವುದರಲ್ಲಿ ತಪ್ಪೆಂಬೇನಿಲ್ಲ
ಅಡಿಪಾಯದ ಬಗ್ಗೆಯೂ ಚಿಂತೆಯಿರಬೇಕು
ಜಗುಲಿಗಳು ಜಾಗ ಬಿಟ್ಟಾಗಲೂ ಕೂಡ
ಅದರಡಿಯ ಚೂಪು ಮುಳ್ಳುಗಳ ಬಗ್ಗೆ
ವಿಶೇಷ ಅರಿವಿರಬೇಕು

ನಯವಾದ ಗಾಳಿ
ಹಿತವಾದ ನೆರಳೇ ಆದರೂ
ನಮ್ಮ ಕಣ್ಣು, ಮೂಗಿನ ಬಗ್ಗೆಯೂ
ಜಾಗ್ರತೆಯಿರಲೇ ಬೇಕು

ಯಾರಿಗೆ ಗೊತ್ತು ?
ಹೆಜ್ಜೆಗಳು ನನ್ನವೇ ಆದರು
ಆ ಹಾದಿ ಸಾಗುವುದು
ಮತ್ತೊಬ್ಬರ ಕಟ್ಟಾಜ್ಞೆಯಿಂದಲೇ ನೋಡಿ.
 
 
ಚಿತ್ರಕೃಪೆ: www.ddo.com